‘OPINION POLL’ ANI GÕYCHE KRISTANV

Halinchea tempar ‘Father of the Opinion Poll’ hea Dotor Jack de Sequeira hankam dilolea ‘title’-acho kaim zonnamni khor nixedh kela. Ho nixedh thoddeach activists-ancho zaun asa. Hantuntlo mukhel veokti mhollear Uday Bhembre, zo fattle kaim mhoine khobram-potramni ani TV-cher aplo nixedh sobhemazar kollit korta. Hea oslea mota fattlean rajkaronn khoinchem ani koslem, hem somzun ghevpacho proyotn hanv korunk sodtam.

Bhembre-chea mota pormannem Dr. Sequeira ho ekloch ‘Opinion Poll’-acho fuddari naslo, punn tache barobor anik-ui zaite zonn asle. Oxem aslolean, Bhembre mhonntta, Dr. Sequeira-k ‘Opinion Poll’-acho Bapui mhonnop chukichem zaun asa. Tachea hea oslea motank zaitem ‘media attention’ mell’llem ani Bhembre-chea motancho virodh-ui zaitea zonnamni kelo. Bhembre-chem mot somzun gheunk ani tachi foddnnixi korunk ami tachea eka ‘interview’-acho ul’lekh korunk zai. Ho ‘interview’ O Herald disalleacher (polle Herald Review, 10 May, 2015) uzvaddak ailolo. Hie mulakhotint Bhembre-chim motam Radharao Gracias hanchea motam vangdda sador kelolim asat ani zaitem jem Bhembre mhonntta tem Radharao Gracias-achim motam vachtoch fals vo chukichim oxem disun yeta.

Bhembre-chea mota pormannem, itihas ho konnench bodlunk zainam, karonn to asa tosoch asta (“History is history, whether one likes it or not”). Hench dhoronn gheun to kaim lok ‘Opinion Poll’-acho itihas kiteak sarkho nokllo tem sangunk sodta. Khorem mhollear hem oslem dhoronn aiz sonvsarachea itihaskaramni soddun dilolem asa. Bhembre-chem hem dhoronn ‘positivist method and philosophy’ hacher adharun asa, oxem disun yeta. Hea ‘positivist method and philosophy’ khala oxem manun ghetat ki itihasantle ‘facts’ he apo-ap ulounk xoktat; tankam itihaskarachi vhoddli xi goroz nasta. Itihaskaramni he ‘facts’ fokot eka fatlean ek oxem korun manddunkuch zai, itlench. Punn oslem dhoronn aiz fottichem tharta, oxem zannkaramni dakhoun dilam. Tor Bhembre oslea dhoronnacho adhar gheun aplim motam kiteak manddtta? Amchea mota pormannem oxem kelolean Bhembre aple zaite ‘agendas’ fuddem vhoronk sodta. Tor te khoinche tem atam polleum-ia.

Bhembrecho poilo ‘agenda’ mhollear to apunnuch ‘Opinion Poll’-achea itihasacher ulounk xrextt oxem somzota. Hem to don toramni korta: Poilie suvater to soglea Kristanv lokank – chodd korun bahujan Kristanvank – je Dr. Sequeira-chea fattlean kal ani aizui ubhe asat tankam, to unnak lekhta ki tankam ‘Opinion Poll’-achea itihasachi sarki mahiti nam mhonnun. Oxem kortanam Bhembre zotnay gheta ani thoim Kristanv somazacho ul’lekh kori nam. Punn konnacher ani khoinchea somazacher to ttika korta  tem amkam sangonastanam kollun yeta.

Dusrie suvater, Bhembre amkam sangta ki apunn ek sakxidar vo ‘first-hand witness’ mhonnun ‘Opinyon Poll’-achea tempavelo. To mhonntta apnnem fokot ‘Opinion Poll’-acher prokaxit zalolem sahityuch nhoi punn te vixim aslolo itihas onnbhovlolo asa mhunn. Haka lagun to mhonntta ki taka hea ‘Opinion Poll’-achea itihasachi chodd bori zannvay asa mhunn. Dusre zonn je aiz Dr. Sequeira-cho zoi-zoikar kortat, te  Bhembre-chea mota pormannem, tea tempar chodd dhaktte asle vo zolmant legun yeunk nasle; haka lagun tankam ‘Opinion Poll’-achea itihasachi zannvay nam. Bhembre-chem hem dhoronn vichitr mhonnunk zai, karonn tachem dhoronn tor ami svikarlem zalear itihasachi likhnni ani xastr kabar zatolem, hantunt il’lo-i dubhav nam!

Bhembre-chem dhoronn vichitr ani fokannachem tharta karonn zaitea vorsam savn choltolea itihaskaram modem ani her somajik zannkaram modem jio ‘debates’ zaliat tancher hem dhoronn add veta. Dekhik ami E. H. Carr hachem What is History? hea pustokacho ul’lekh kelear puro zata. Hea pustokant Carr mhonntta ki ‘facts’ he aplea pãyar ubhe ravun svota ulounk xokonant; tankam ‘interpretation’  vo somzonni ani foddnnixi zai poddtta. Hakach lagun itihaskarachi goroz poddtta. Zalear hatunt itihaskar aple ‘biases’ bhitor haddunk xokta – ani zaite pavttim haddtai bi. Dekhun eka itihaskaran ‘facts’ topasunk zai ani te topasun ‘cross-check’-ui korunk zai. Ami oxem chintunk zainam ki zannim itihas khud onnbhovla tankam itihasachi bori vo sarki zannvay astoli mhunn. Oslea mon’xam lagim ghoddye kosli tori mahiti asot, punn tich  mahiti sarki vo  khori oxem ami manunk zainam. Oxem aslolean ami zonn eklean kholayen chinton korop gorjechem. Zonn eklean ap-apli bhumika zannun gheun proyotn korunk zai: itihasacho bhagidar (participant) toxench itihasacho sod ghevpi vo somzonni divpi (interpreter).

Bhembre-chim motam ani mud’de hankam kainch mol nam hachi govay amkam Radharao Gracias hanchea motantlean melltta. Gracias ek suchovnni korta ani ti mhollear Gõychea Kristanv lokanchem zalolem ‘marginalization’ ami hea ‘Opinion Poll’-achea itihasant somzun gheunk zai mhunn. Rajki mollar hem ‘marginalization’ chodd marekar zaun asa, oxem Gracias amkam sangta. Hakach lagun Gracias Romi-Nagricho mud’do hea ‘Opinion Poll’-achea mud’deak zoddtta ani sangta ki Romi lipik bhair dovorop hich ek vhoddantli-vhodd govay Gõychea Kristanv lokanchea ‘marginalization’-achi zaun asa mhunn. Gracias fuddem mhonntta ki je monis aiz Dr. Sequeira-k ho man dila tacher nixedh martat tech lok kal ani aizui Romi lipik bhair dovorunk vavurtat mhunn. Amkam hacher oxem disun yeta ki Gracias-a sarko monis Gõychea Kristanv lokanchea ‘marginalization’-acher amchem lokx thir korta, zalear Bhembre sarko monis – tache ‘historical facts’ ani apunn ‘first-hand witness’ oxem sangun – heach ‘marginalization’-acho onnbhov zo Gõychea Kristanvamni onnbhovla to nakarta vo nhoikarta. Heach ‘marginalization’-acho onnbhov zor ami monant dovorlo zalear ‘Opinion Poll’-acho itihas zanna zaun ghetanam ho itihas koxe bhoxen bodoltolo?

Gracias-achem jem mot ami voir vachlam tacher anikui kitem sangchem asa.

Romi lipi ani Nagri lipicho vad gheun amcheamni Bhembre sarkea kar’yakorteamni Romi lipik koxi koddek dovorli hem polleunk zata. Zori tor hanv Bhembre-chem kar’ya ani motam hanga somzun gheunk sodtam, torui amkam oxem mhonnunk zai ki oslim motam apnnavpi Bhembre ho ekloch nhoi. Gõyant him motam sabar her dusre lok manun ghetat ani osle lok chodd korun unch zuttiyechim podam aplea tabeant gheun bosleat.

Tor Nagrivadiancho Romi lipik mukhel nixedh  khoincho? To mhollear Romi lipi Purtugez vosnnukponnantlean Gõyant aili, dekhun ti bhaili ani oddechi lipi zaun asa. Haka lagun Romi lipi Gõychi ani Konknnichi nizachi lipi nhoi, oxem Nagrivadiank dista. Romi lipiche add anikui zaitim dhoronnam Nagrivadi mukhar ghaltat – ki Romi lipichea sahityak dorzo nam; ki Nagri lipi chodd bori Konknni bhaxek karonn ti Bharoti lipi; ki Romi lipichi magnni mhollear ‘anti-national’ tharta karonn tantuntlean Gõykaranchem des-bhoxtteponn zata.

Fattlea sabar doxokamni zo tamaxa zala, tantunt ek khobor titli zoran konnuch korinaslo. Ani ti mhollear, jednam Romi lipichi hinnsavnni zata – tie hinnsavnnient Gõychea Kristanv lokanchem-i hinnsavop zata. Oslem hinnsavop choddxem Gõychea bahujan Kristanv lokanchem zata. Hem bahujan Kristanvank chodd lagta karonn zo unch-zaticho Kristanv asa to aplea unch-zatichea zolmak lagon hea oslea ‘attacks’-am pasun pois ravunk vo vochunk xokta. Dekhun amcheamni mhonnunk zata ki Romi lipik man’yatay nam divop mhonnche akkhea Gõychea Kristanv lokanchea sonvskrutayek man’yatay nam divop mhonnun.

Halinchea tempar, Bhembre sarko kar’yakorto hie Romi lipik pois dovorpachea prokoronnant mukhel fuddari asa oxem amcheamni mhonnunk zata. Bhembre-n 2006 vorsa ek chitt sogllea Gõychea ‘Cabinet’ montriank boroiloli tacho ul’lekh korunk zai. Hie chittintlean (Goanet thollacher ti sambhallun asa ani vachunk mellta) amkam disun yeta ki 2006 vorsa tednancho sorkar Official Language Act, 1987 hea Bill-ant bodol haddunk sodtalo mhunn. Bhembre tea kallar Congress pokxacho ‘think-tank’ Vichear Vibhag – hacho Chairman aslolo, ani he vorvim tannem Official Language Act, 1987 hea Bill-ant kosloch bodol zaunk zainam vo korop sarkhem nhoi oxem soglea tednanchea Gõychea montriank potr boroun sanglolem.

Toxench, ek voros poilim – mhollear 2005 vorsa – Bhembre-k Xavier Centre for Historical Research he sonsthen ulovop korunk apoilolo. Tannem ‘Road Map for the Standardisation and Development of the Konkani Language’ he mathallea khal aplem ulovop kel’lem. Bhembrechem mukhel dhoronn hea ulovpant aslem tem mhollear Konknni lokamni Nagri lipi khal ektthaim vo ekvottit zavpachem. Dusrie bhaxen sangchem zalear je konn Romi, Kon’nodd, Malayalam ani Perso-Arbi lipint aplem borovop kortat ani apli khaxeli sonskrutay sambhallun dovortat tannim tem sogllem soddun diun atam fokot Nagri lipicho vapor korcho. Atam amkam ho ‘link’ disun yeta: koxe bhoxen Bhembre eke bazuk ‘standardization’-acho ulo marta ani dusrie bazun Romi lipik man’yatay nam divpant vavurta.

Hantuntlean ek ami ghott monant dovrunk zai. Osle proyotn je zatat te sabar somudayank koddek ani bhair dovorunk zatat mhunn. Hem ‘exclusion’ fokot Gõychea Kristanv lokam purtench nhoi punn Hindu bahujan somazachea lokank legun lagu zata. Hindu bahujan somazantle fuddari Nagri lipichem ani Ontruzi Konknnichem ‘imposition’ tancher unch-zatinchea lokancho aple mutthint dovorpacho yotn oxem te manun ghetat. Dekhun te Moratthi bhaxe khala ektthaim zaunk sodtat. Punn Romi lipintli Konknni hich nizachi Konknni oxem he Moratthivadi fuddari manun ghetat.

Hanvem voir ul’lekh kelolo asa ki Bhembre jem kitem mhonntta ani tachim motam asat tim tachinch nhoi punn Gõyant aslolea sabar lokanchim mhunn. He lok unch zuttiyer ason Gõycher ani Gõychea sonskrutik mollacher aplem raj choloitat ani aplo tabo ghott dovrun asat. Hanga amcheamni Medium of Instruction (MoI) vadacho adhar gheunk zata. Inglez bhas MoI zaunchi oxi mangnni tednam fokot Kristanv lok kortale oso goir-somoz kaim zonnamni kelolo. Haka lagun, sodanchie bhoxen Kristanv lokank ‘anti-national’ mhonnun thomnne marunk laglole. Je konn Inglez bhaxek MoI nam korchi oxi magnni kortale tech lok Romi lipik-ui man’yatay nam divpant vavurpi asle. Hantunt vhoddlem xem kainch ek ojap nam. MoI vadachea vellar je kar’yakorte Bharoti Bhasha Suraksha Manch hache khal ektthaim zalole tankam Hindu bahujan somazantui je Moratthivadi asle, tancho zaito tenko mell’llolo.

Hindu bahujan zome bamonnvadi ‘interests’-ank tenko diit vo nam diit, sodanch oxem zata ki Gõychea Kristanv lokanchio magnnio ani hokk asat tancher khor nixedh ani hinnsavnni zata. Hem chodd korun bahujan Kristanvancher odhik promannan zata. Ti magir magnni kosli-i zaum: Romi lipik man’yatay – zantunt Kristanv lok okosmat Purtugezanche ‘agents’ zatat; magir ti magnni Inglez bhas MoI korchi oxi zaum – zantunt Kristanv lok Bharoti sonskrutaye add vetat mhunn arop zatat; nam zalear halinchea tempar Kristanv lok ‘Opinion Poll’-acho itihas sarke somzun ghenant ani to itihas kaichea-kai bodolpak sodtat, oxem mhunnon. Hie toren Kristanv lokank hinnsaun, ani tancher thomnne marun, tanchi rajki mollar asloli ‘legitimacy’ kaddun ghevpacho proyotn zata – ani khub koddem he proyotn yexosvi zalole amkam disun yetat. Tech bhoxen, ‘Opinion Poll’-achea vellar je Kristanv ‘anti-mergerists’ asle te ‘anti-national’ ani ‘fifth-columnist tendencies’ toyar korpi oso arop kortale – chodd korun tednancho Rakhonn Montri Y. B. Chavan (polle Rajan Narayan ani Sharon D’Cruz, Triumph of Secularism: Battle of the Opinion Poll in Goa, 2011).

Aiz amkam Dr. Sequeira-k konnem ‘Father of the Opinion Poll’ hem nanv dilem tem sarkem khobor nam. Ani hem ami khalteponnan man’ya korunk zai. Punn hem man’ya korun ghetananch ami hem-ui monant dovorunk zai ki Dr. Sequeira bahujan Kristanvank ek ‘icon’ zaun asa. ‘Opinion Poll’-achea itihasant Dr. Sequeira-chi bhumika kosli ani kitli vhodd asli, he prosn vicharop gorjechem. Punn osle prosn Bhembre sarkea Nagrivadianchea hatantlean suttave zaunk xokonant karonn tacho ‘agenda’ veglloch asa. Tacho ‘agenda’ kaim lokam purtoch moryadit asa – je lok Gõychea sonskrutik ani rajki mollar aplo xek choloitat. ‘Opinion Poll’-acho itihas itihaskaramni borouncho – zannim hea xetrant aplem xikxonn ani sod-vavr kela tannim – ani nhoi Bhembre sarkea kar’yakorteamni!

Xevottak, ami zor Gracias-achi suchovnni manun ghetli zalear amkam disun yetolem ki halinchea tempar Gõychea Kristanv lokank rajki mollavoilean pois dovorleat mhunnon. Hi onit zalia ti ami koxi sudhraunchi hacher poilim vichear korunk zai. Gõychie osmitayecho bhar magir amcheamni mathear gheunk zata.

(Ho lekh Gulab, Julay 2015 hea ankant uzvaddak aila)